Встреча ветеранов

Улуу Кыайыы күнүн бэлиэтии Үүнэр көлүөнэ бибилотекатыгар тыыл, үлэ  бэтэрээннэрин, сэрии сылын оҕолорун ыҥыран бырааһынньыктааҕы дьоро тэрээһини тэрийдэ. “Сүрэхтэн тахсыбыт ылбаҕай ырыалар” диэн тыыннаах музыкалаах, ырыа-тойук аргыстаах истиҥ көрсүһүүнү ыытааччытынан көмүс куоластаах ырыаһыппыт Көстөө Андросов буолла. Урукку сыллардааҕы уостан түспэт биллэр ырыалары ыллаатылар, итии чэйдээх минньигэс астаах сандалыга олорон күө-дьаа иһирэхтик кэпсэттилэр. Маныаха бары билэр музыка учуутала Надежда Федотовна Егорова фортепианоҕа оонньоон, тыыннаах матыыбынан доҕуһуоллаан дьоро киэһэни киэргэттэ.Кыайыыбыт чаҕылхай күнүн улуус баһылыгын социальнай боппуруостарга солбуйааччы Наталья Алексеевна Спиридонова бэтэрээннэри эҕэрдэлээн улуус дьаһалтатын аатыттан өйдөбүнньүк бэлэхтэри туттарда. Түмүккэ, ыалдьыттар бары сөбүлүүр ырыаларыттан биирдии күпүлүөтү уөрэ-көтө ыллаатылар, тэрийбит салайааччыларга махталларын тиэртилэр.