Сэтинньи 28 күнүгэр улуустааҕы киин библиотекаҕа Олоҥхо декадатын түмүгүнэн төгүрүк остуол тэриллэн ааста

Сэтинньи 28 күнүгэр улуустааҕы киин библиотекаҕа Олоҥхо декадатын түмүгүнэн төгүрүк остуол тэриллэн ааста. Манна куйаар ситиминэн буолан ааспыт «Олоҥхото ааҕыахха" диэн күрэх түмүгүнэн кыайыылаахтар остуол тула олорон Былатыан Ойуунускай суруйбут "Дьулуруйар Ньургун Боотур" олоҥхотун ааҕан иһитиннэрдилэр. Күрэх тэрийээччилэрэ Алмаас култуура киинин, оройуоннааҕы библиотека уонна Оҕону кэрэҕэ угуйар оскуола тэрилтэлэр  үлэһиттэрэ холбоон көҕүлээн ыыттылар. Күрэххэ оскуола оҕото, ыччат уонна улахан дьон холбоон барыта 11 киһи кыттыыны ыллылар. Кыайыылаахтарга сэмэй бэлэхтэри туттартаатылар. 

Олоҥхону хайдах араастаан ааҕыахха, дьүһүйүөххэ, туойуохха сөбүн илэ харахпытынан көрдүбүт-иһиттибит. Олоҥхону сэҥээрээччилэр, ааҕааччылар биһиги испитигэр бааллара хайҕабыллаах, чуолаан эдэр ыччат интэриэһиргиирэ, сөбүлээн ааҕара эбэтэр бэйэтэ этинэн-хаанынан иэйэн-куойан туран холонон көрөрө көрүөххэ-истиэххэ кэрэ! 

Маны таһынан төгүрүк остуолга кэлбит ыалдьыттарбыт билигин тылы үөрэтии эйгэтигэр сытыытык турар боппуруостары, кэлэр көлүөнэ ортолоругар саха тыла сүтэн эрэрин туһунан аһаҕастык кэпсэттилэр, бэйэлэрин көрүүлэрин үллэһиннилэр. Ону тэҥэ олоҥхо туһунан билииллэрин, саха тылын-өһүн, өс хоһоонун төһө өйдүүллэрин бигэргэтэн ТОК оонньууга оонньоотулар. 

Өссө төгүл тэрийээччилэр ааттарыттан кыттааччыларга  уонна ыалдьыттарга махталбытын тиэрдэбит!