Платон Алексеевич Ойуунускай бүгүн 132 сылын туолла

Саха судаарыстыбаннаһын төрүттэспит биллиилээх судаарыстыбанай диэйэтэл, саха суругунан уус-уран литэрэтиирэтин төрүттээччи, учуонай Платон Алексеевич Ойуунускай бүгүн 132 сылын туолла.

П.А. Ойуунускай сэтинньи 11 күнүгэр 1893 сыллаахха Таатта улууһун III Дьохсоҕон нэһилиэгэр дьадаҥы бааһынай дьиэ кэргэҥҥэ төрөөбүтэ. 14 саастааҕар оскуолаҕа киирбитэ, итиэннэ 1917 сыллаахха Дьокуускайдааҕы учууталлар семинарияларын бүтэрбитэ. 1917-1918 сылларга Томскайдааҕы учууталлар институттарыгар үөрэммитэ.

Ойуунускай бастакы “Үлэһит ырыата” диэн хоһоонун 1917 сыллаахха суруйбута. 1919 сыллаахха “Син биир буолбаат?” диэн норуокка киэҥник биллибит хоһоону айбыта. Маны кини Максим Аммосовка анаабыта. Платон Ойуунускай айымньылара саха норуотун литэрэтиирэтин көмүс фондатыгар киирбиттэрэ. “Дьулуруйар Ньургун Боотур” уонна “Туналыйбыт ньуурдаах Туйаарыма Куо” олоҥхолору хомуйан бэчээккэ бэлэмнээбит улахан өҥөлөөх. Атын омук айымньыларын сахалыы тылбаастаабыта. Норуокка улахан суруйааччы быһыытынан киэҥник биллэр.Саха биир бастакы сэһэнньитэ, хас да драманы суруйбута.

Платон Алексеевич Ойуунускай саха судаарыстыбаннаһын, култууратын уонна билимин сайдыытыгар киллэрбит сүҥкэн кылаата төрөөбүт норуокка сулууспалааһын үтүө холобура. Кини олоҕо уонна айар үлэтэ төрөөбүт-үөскээбит дойдуга итиэннэ бэйэ норуотугар дириҥ таптал хайдах курдук устуоруйа хаамыытын уларытар модун кыахтааҕын чаҕылхай кэрэһитэ!